કોલકાતા નાઈટ રાઈડર્સે મુંબઈ ઈન્ડિયન્સને 24 રને હરાવ્યું. મુંબઈની આ હારથી તેની પ્લેઓફમાં પહોંચવાની આશા લગભગ ખતમ થઈ ગઈ છે. તે જ સમયે, KKRના ખાતામાં 14 પોઈન્ટ છે. શ્રેયસ અય્યરની ટીમ પોઈન્ટ ટેબલમાં બીજા સ્થાને છે અને પ્લેઓફ માટે ક્વોલિફાય થવાની અણી પર છે. મુંબઈ -0.356 નેટ રન રેટ સાથે નવમા સ્થાને છે.

170 રનના લક્ષ્યનો પીછો કરવા ઉતરેલી મુંબઈની બેટિંગ લાઇન અપ ફ્લોપ રહી હતી. પાવરપ્લેમાં MIએ 46 રનના સ્કોર પર ત્રણ વિકેટ ગુમાવી દીધી હતી. ઈશાન કિશન 13 રન, નમન ધીર અને રોહિત શર્મા 11-11 રન બનાવીને આઉટ થયા હતા. આ મેચમાં ચોથા નંબર પર બેટિંગ કરવા આવેલા સૂર્યકુમાર યાદવે ધમાકેદાર પ્રદર્શન કર્યું હતું. તેણે 35 બોલમાં 56 રન બનાવ્યા હતા. 360 ડિગ્રીના બેટ્સમેને 30 બોલમાં ફિફ્ટી ફટકારી હતી. આ તેની આઈપીએલ કારકિર્દીની 24મી અડધી સદી છે. જ્યારે ટિમ ડેવિડ 24 રન બનાવવામાં સફળ રહ્યો હતો. મુંબઈ માટે તિલકે ચાર, નેહલે છ, પંડ્યાએ એક, ગેરાલ્ડે આઠ, પિયુષે શૂન્ય અને જસપ્રીતે એક રન બનાવ્યા હતા. મુંબઈની ટીમ 18.5 ઓવરમાં 145 રન બનાવીને ઓલઆઉટ થઈ ગઈ હતી.